0 件產品

總額: HK$0.00

論壇

 10年過後,《大長今》演員去咗邊? 返回上一頁     發表回覆

Stacy
[樓主]

數數手指,大長今已經係10年前GE事..

而家GE韓劇都唔多見到E班前輩了..

究竟佢地去哂邊?

 

李英愛 (長今)
拍完《大長今》,李英愛就成為咗最受歡迎嘅韓國演員之一。而做完善良嘅長今之後,佢參演咗電影《親切的金子》,做一個殺咗小朋友又等緊報仇嘅女人。呢齣戲雖然受到極大爭議,但係亦令佢得到影后殊榮,身價又升咗一截。
2009年,佢同鄭浩英結咗婚,一向都恩愛示人,仲生咗一對仔女,搬去近郊地區,等小朋友多啲接觸大自然。愛姐專心照顧家庭,最多都係參與吓品牌活動,拍劇?咪玩啦。早2年拍過特備節目,影佢嘅家庭生活。好多人都想李英愛拍《大長今2》,亦都傳咗好多次佢唔拍嘅消息,不過劇組就話一切都係睇愛姐頭,佢唔接就唔拍咁話。

 

池珍熙 (閔大人)
當年做Man到爆嘅閔大人,成為唔少師奶偶像嘅池珍熙Oppa拍完《大長今》後,就得到香港導演陳可辛邀請,出演佢套歌舞電影《如果·愛》。當時仲係張學友親自教佢講中文同埋歌唱技巧添。憑著《大長今》殺入中國市場嘅佢,隨後亦出演過大陸電影《我在路上最愛你》,上年仲同「性感女神」鍾麗緹拍電影《壞姐姐之拆婚聯盟》。有傳話佢同面對女神挑逗,因為太緊張而起咗生理反應……

 

甄美里 (崔尚宮)
當年奸到出汁,見到佢背面就會開始驚嘅崔尚宮,其實真名叫甄美里。唔講唔知,原來佢喺韓國小姐比賽中曾經獲得最上鏡小姐獎,繼而進入娛樂圈。去到而家都仲會喺電視框見到佢,例如韓劇《家人之間為何這樣》及《屋塔房王世子》等等。佢兩個女亦加入咗娛樂圈。大女李侑菲近排都有喺紅爆劇集《皮諾丘》中飾演尹宥萊一角;細女就同咗經理人簽約,齊齊做演員。

 

梁美京 (韓尚宮)
唔好睇佢喺《大長今》入面做韓尚宮咁溫柔,原來佢真人唔好蝦㗎!佢拍完《大》之後,就同細佬對簿公堂,話身兼佢經理人嘅細佬暗吞咗佢高達9億韓元(約630萬港元)嘅酬勞,而細佬就否認,仲反指佢姐姐逃稅。無論如何,佢係好戲之人係毋庸置疑嘅,現時就喺仁德大學做放送演藝學系教授,亦時不時會出演劇集。

 

 

朴恩惠 (連生)

「連生」爆紅之後,06年獲邀拍台劇《深情密碼》,仲同許志安有對手戲。過多2年,佢就嫁咗俾一位企業家,仲生咗對孖仔!復出之後擔正拍過韓式師奶劇《粉紅色唇膏》,亞視都有播過。

0
引用 2015-03-04 11:04
bChat